John-O binuhusan ng Viva Mineral Water

Isang impresibong pagbaligtad ang ipinamalas ng Viva Mineral Water sa halftime, nang mula sa 15 puntos na pagkakabaon ay nagrally sila tungo sa 60-58 tagumpay sa semifinals ng Sunkist-PBL 2003 Unity Cup sa Pasay Sports Center.

Pinamunuan ni Dennis Miranda ang Viva sa kanyang 14 puntos habang nag-ambag naman ng 11 si Jeff Napa nang pangunahan ng dalawa ang matinding rally upang makaganti sa kanilang 62-70 kabiguan sa John-O noong Abril 5.

"The guys decided for themselves to stick together and face the challenge," ani Viva coach Koy Banal.

Malakas ang panimula ng John-O sa pamamagitan ng 11-0 atake at tapusin ang unang yugto sa iskor na 20-7 ngunit umabot pa ng hanggang 15 puntos ang kalamangan, 35-20 may 44 segundo ang nakalipas sa third quarter.

Nabaon sa 28-42, nagpakawala ng dalawang triples at dalawang freethrows si Napa para sa 11-0 blast na naglapit sa iskor sa 40-42, may 24.1 segundo na lang ang nalalabi sa huling canto.

Sinundan pa ito ng 7 sunod na puntos ni Miranda sa isa pang 12-2 run upang baligtarin ang 40-44 deficit sa 52-46 kalamangan para sa Viva, may 6:49 pa ang nalalabing oras.

Habang ang lahat ay nasa isip na ng Viva ang kanilang panalo matapos ang 59-53 abante, ngunit naipuwersa ng John-O ang isang mahigpit na endgame nang isang mabilis na layup ni Rani-del de Ocampo at na-intercept niya ang pasa kay Sonny Margate upang makumpleto ang three-point play.