Mainit ang rivalry nina Austria at Baculi

Muling mabubuhay ang rivalry ng top two coaches na sina Junel Baculi at Leo Austria sa paghaharap ng kanilang mga koponang Welcoat Paints at Dazz Greasebusters.

Di na kakaiba para kina Austria at Baculi ang hamon ng finals series ngunit sa pagkakataong ito ay ibang koponan ang kanilang bibitbitin.

Si Baculi na nagbigay ng pitong kampeonato sa Paint Masters ay nasa poder na ngayon ng Dazz na nagbigay sa kanya ng unang coaching break habang si Austria na dating coach ng Shark ay nasa kampo na ng Welcoat.

"Although kabisado na namin ni Junel (Baculi ang isa’t isa being best of friends ans fierce rivals on court, this Challenge Cup Finals is much different challenge compared to our past championship battles. Parehong bago ‘yung team na hawak namin this conference so ibang klaseng timplada ang gagawin namin this time," ani Austria.

"Kahit nasa finals na kami, coach Leo and I are still in the process of getting to know the players much better. Iba kasi pag championship. You will have to draw out the best from our players and see how the combination works in certain situations," wika naman ni Baculi.

Magsisimula ang kanilang best-of-five championship series sa Huwebes sa Quezon Convention Center sa Lucena City.

Maghaharap naman sa best-of-three mini series ang Blu Sun Power at LBC-Batangas.