Sunkist talsik na rin

Isinama ng Cheese Balls-Shark sa pagkakasibak sa kontensiyon ang Sunkist-Pampanga nang kanila itong igupo, 87-70 kahapon sa 2002 PBL Challenge Cup sa Makati Coliseum.

Ang panalo na ikalawa ng Cheese Balls sa 10-laro, ay nagsara ng pinto para sa Juicers sa kani-lang kampanyang makapasok sa semifinals sa pamamagitan ng 4-0 sweep.

Ito rin ang unang panalo ni coach Philip Cezar sa apat na laro sapul nang punan nito ang puwesto.

Pinahirapan ng Sunkist-Pampanga ang Cheese Balls-Shark nang sila ay lumamang pa sa 34-33 sa huling bahagi ng ikalawang quarter ngunit kumulapso sa final half.

Umiskor si Nelbert Omolon ng crucial baskets na nagdala sa Cheese Balls-Shark sa 15-puntos na pangunguna, 58-43, 3:07 ang natitira sa ikatlong canto.

Nakalapit ang Juicers sa 57-65, dalawang minuto pa lamang ang nakakalipas sa fourth quarter ngunit nagtulong sina Warren Ybañez at Stephen Padilla sa 11-2 blast para ipundar ang 76-59 kalamangan ng Cheese Balls-Shark, 4:28 na lamang ang oras sa laro.