3 gold medal nakataya ngayon

Tatlong gintong medalya ang nakatakdang pag-agawan ngayon sa athletics event sa pagsisimula ng kompetisyon ng 4th edisyon ng Batang Pinoy-Philippine National Youth Games sa Puerto Princesa Sports Complex.

Inaasahang magtatagisan ng lakas ang mga batang atleta para makopo ang mga nakatayang ginto sa girls’ long jump, baseball throw at boys shot put events kung saan sisimulan na rin ang elimination games para sa baseball, lawn tennis, wrestling, arnis, weightlifting, volleyball, softball, football, chess, judo, karatedo, golf, boxing at badminton.

Taliwas sa mga nakaraang sistema sa pagpili ng team champion at Most Valuable Athlete, ang pagpili ngayong edisyon ay ibabase sa point system at hindi na sa makukubrang medalya.

Ang tatapos ng unang puwesto ay pagkakalooban ng pitong puntos at karagdagang 10 puntos para sa sinumang makakabura ng PNYG record at 5 puntos naman sa makakatabla lang.

Ang second placer ay bibigyan ng limang puntos, apat sa third placer, tatlo sa fourth placer, dalawa naman sa fifth placer at isa sa sixth placer.