Flag-bearer si Django!

Itinalaga si Francisco ‘Django’ Bustamante, na iniranggo bilang isa sa world’s top billiards players bilang standard bearer ng Philippine delegation sa Asian Games sa Busan sa Setyembre 29 hanggang October 14 ngayong taon.

Ang pagkakahirang kay Django ay inihayag kahapon ni Philippine Olympic Committee president Celso Dayrit makaraang kumonsulta kay RP delegation chief of mission Tom Carrasco at sa POC executive Board members at sa BSCP president Ernesto Fajardo.

"It is only fitting that we reward Django (Bustamante) for his sterling performance in the recent World Pool Championship in Cardiff, Wales by letting him carry the (Philippine) flag in Busan," pahayag ni Dayrit.

Tumapos ang 38-anyos na si Bustamante ng ikalawa sa Amerikanong si Earl Strickland sa Cardiff tournament nang matalo sa iskor na 15-17 sa finals kung saan siya ay lumalaro na nagdadalamhati dahil sa pagkamatay ng kanyang anim na buwang anak na babae.

Nang makontak sa Virginia (USA) kung saan siya ay kasalukuyang naglalaro sa Peninsula 9-Ball Open kasama ang isa pang mahusay na cue artist ng bansa na si Efren ‘Bata’ Reyes, sinabi ni Django na "I am greatly honored."

Si Bustamante ay iniluklok bilang Player of the Year ng US magazine Billiards Digest noong 1998 at nakopo rin niya ang nasabing karangalan mula sa Philippine Sportswriters Association makaraan ang isang taon.

Kabilang sa kanyang mga major titles ang Japan Open kung saan kanyang ginapi si Ralf Souquet, 9-0 sa finals, IBC World Tour sa Munich, Germany, 2002 Motolite World 9-Ball Challenge sa Araneta Coliseum kung saan kanyang winalis ang Amerikanong si Corey Deuel, 13-8 sa finals, World Pool Masters sa Essex (UK) na nanaig naman kontra Strickland, 7-6 sa finals at ang 1998 Tulsa 9-Ball Open sa Oklahoma.

Tumapos rin si Bustamante ng ikalawa sa World Pool League sa Warsaw, Poland at ikatlo sa World Pool Championship sa Cardiff noong 1999.