UAAP sasambulat sa big dome sa Sabado

Iisa lamang ang misyon ng anim na iba pang koponan na kasapi sa University Athletic Association of the Philippines ang masupil ang inaasahang dominasyon ng kasalukuyang kampeong De La Salle University at ang mahigpit nilang karibal na Ateneo de Manila sa pagsambulat ng aksiyon sa July 13 sa Araneta Coliseum.

Sisimulan ng Blue Eagles ang kanilang kampanya para muling makapasok sa finals sa kanilang nakatakdang engkuwentro ng National University sa alas-4 ng hapon pagkatapos ng sagupaan sa pagitan naman ng University of the East at ng University of the Philippines sa alas-2.

Ngunit bago masilayan ang umaatikabong aksiyon, isang simple ngunit makasaysayang opening ceremonies sa ala-una ng tanghali na tatampukan ng tradisyunal na parada ng mga koponan.

Inaasahan na magiging mahigpit ang hamong ibibigay ng NU Bulldogs kung saan sa nakaraang season ng liga, ito ay nakapagpakita na ng talim ng kanilang pangil matapos na makapasok sa Final Four.

Sa Linggo, nakatakdang sumabak sa aksiyon ang tropa ni coach Franz Pumaren na haharap naman sa Far Eastern University sa alas-4 ng hapon dito rin sa Big Dome, habang magtitipan naman ang University of Santo Tomas at ang Adamson U sa alas-2.

Bagamat nawala sa lineup ng Bulldogs sina coach Manny Dandan, ang mga manlalarong sina Gilbert Neo at Archen Cayabyab na naglalaro na sa PBL, babalikatin nina Froilan Baguion, Alfie Grijaldo at Jeff Napa ang kampanya ng Bulldogs na siguradong mas malaki ang naging improvement ngayon.