JAWO, NAGSALITA

Matagal na ring hindi nakakakasalamuha ng mga sportswriters si Senador Robert Jaworski, dala ng mga pangyayaring pulitikal ng mga nakaraang buwan, at bigat ng trabaho sa senado. Subalit humarap ang kinikilalang pinakasikat na basketbolista ng bansa sa SCOOP sa Kamayan Padre Faura noong Biyernes, at marami siyang gustong sabihin.

Una, ipinaliwanag ni Jaworski ang kinalabasan ng pagbibigay ng cash incentives sa mga atletang nagwagi ng medalya sa Olympics at Asian Games. Ayon kay Jaworski, kung may mga atleta man na nagtampo dahil sa tingin nila’y nalimutan sila, huwag daw silang mag-alala, dahil nakahanda siyang baguhin ang batas na siya rin ang nag-isponsor para mas marami ang makikinabang.

Nang tanungin siya tungkol sa paglaganap ng mga Fil-Am sa Pilipinas, sabi ni Jaworski, "Kung papayagan natin ang mga Fil-Am, hanggang saan? Noon naman, kahit mga Amerikano, kaya nating tapatan. Hindi naman sa kontra ako sa Fil-Am, pero siguraduhin nating tunay silang may dugong Pilipino, dahil napakarami ng ating mga kababayan ang nagtiyaga na maglaro sa eskuwelahan, pagkatapos ay hindi mapagbibigyang makapaglaro."

Bukod pa riyan, dagdag ng dating PBA, MVP na mas nakakahiya kung manalo tayo ng medalya sa international competition, tapos babawiin lang ang medalya pag natagpuang peke ang ilan sa mga manlalaro.

"Anong gusto ninyo, manalo tayo tapos sabihin ng mga Intsik o mga Hapon na imbestigahan tayo, tapos malamang hindi Pilipino yung player at sunduin dito yung medalya."

Ayon pa kay Jaworski, kailangan munang suriin ng pamahalaan kung ano ang sistemang gusto nitong pairalin sa sports, at hindi pa huli upang ibalik sa Department of Education ang responsibilidad ng programang pampaligsahan sa ating bansa.

Subalit nagbabala ang mambabatas na mahihirapang baguhin ang sistema, dahil hindi siya namumulitika’t maraming ayaw napapahiya tuwing may isinususog siyang batas.

* * *

Kung nais ninyong makipag-ugnayan sa akin, daanin lamang sa [email protected] o [email protected]