2 eksplosibong bakbakan sa Elorde

Dalawa pang umaatikabong eksplosibong championship fights ang ihahandog ng Elorde international Productions sa pamamahala ni boxing promoter Gabriel ‘Bebot’ Elorde Jr., sa darating na Mayo 31, simula sa alas-7 ng gabi sa Grand Flash Ballroom ng Elorde Sports Center.

Bukod sa tunggaliang Juanito Rubillar-Joma Gamboa para sa WBC International lightflyweight championship, mag-aagawan din sa korona sina Archie Villamor at Jerry Pahayhay para sa isa pang championship fight--ang Pan Asian Boxing Association flyweight tilt.

Upang mabuo ang malaking boxing card na pinamagatang ‘Rubillar-Gamboa: Matira Matibay,’ magpapamalas din ng tikas at lakas ang dalawang World Boxing Council International champions--sina flyweight king Randy Mangubat na haharap sa No. 1 flyweight Ramie Laput, habang sasagupain naman ni minimumweight champ Ernesto Rubillar si Flash Villacura na kasalukuyang RP No. 10 minimumweight.