Magsasagupa ang Gin Kings at Phone Pals sa pambungad na laban sa ganap na alas-3:45 ng hapon na susundan naman ng sagupaang Alaska Aces at Coca-Cola Tigers sa dakong alas-5:45 ng hapon.
Ikalimang panalo sa ikapitong laban naman ang puntirya ng Tigers laban sa Aces na maglalapit sa kanila sa eight team quarterfinals.
Matapos matalo sa kanilang debut game, tatlong sunod na panalo ang naitala ng Phone Pals, ang huli ay ang 98-96 panalo sa mahigpit na pakikipaglaban kontra sa defending champion Sta. Lucia Realty noong Marso 7.
Sa likod ng panalong ito, naghimutok ang kontrobersiyal na American coach na si Bill Bayno na nagpahayag ng kanyang pagkayamot sa officiating na dahilan para ipatawag ito ni PBA Commissioner Jun Bernardino para pagsabihan.
Inaasahang muling pangungunahan nina imports Richard Frahm at Gerald Honneycut ang Talk N Text na tatapatan naman nina Jarrod Gee at Desmond Ferguson para sa Ginebra.
Sa likod ng 30-point performance ni Ferguson, nalasap ng Ginebra ang 74-82 pagkatalo mula sa kanilang kapatid na kumpanyang Coca-Cola noong Marso 9 sanhi ng kanilang 1-4 record.
Dahil dito, kinakailangang pag-ibayuhin ni Gee ang kanyang pag-lalaro katulong sina Jun Limpot, Mark Caguioa at rookie Chester Tolomia sakaling di pa rin makakalaro ang injured na si Vergel Meneses.