Juico at Lydia may programa sa IBC TV

Bagong public service program na magtatampok sa dalawang kilalang pangalan sa larangan ng palakasan ang magbubukas ngayong alas-2:30 ng hapon sa IBC TV 13.

Pinamagatang Double Team, naka-pokus ang naturang programa sa sports, health at public service issues kung saan walang iba kundi ang dating Philippine Sports Commission chairman Philip Ella Juico at si dating Asia’s sprint queen Lydia de Vega-Mercado ang siyang hosts ng nasabing programa.

Tampok sa launching telecast ang hinaharap ng bagong itinalagang chairman na si Eric Buhain kung saan tatalakayin ang kanyang buhay bilang dating kampeon na ngayon ay mangangasiwa na ng Philippine sports.

Mabibigyan din ng kaalaman ang mga manonood ng dahilan ng ‘pasma’ kung saan ibabahagi ni Dr. George Canlas ng Philippine Center for sports Medicine ang kanyang practical tips sa nabanggit na karamdaman ng mga atleta.

Ang iba pang segments ay kinabibilangan ng Payo ni Lola Sela, Teeing Off With Callaway, Sports Milestones at Editorial kung saan tatalakayin ng mag-partner ang tungkol sa sports at fitness bilang basic right.