Tangalin at Cortez, kampeon sa Milo Junior Tennis Cup

BAGUIO - Pinabagsak ni Andrew Tangalin si Paul Papa ng San Fernando, La Union, 6-3, 6-0 at pinayuko naman ng kanyang ka-stablemate na si Jun Cortez si Jeric Biasura ng San Fabian, Pangasinan, 7-6, 6-2 upang makopo ang kani-kanilang division title sa pagsasara ng 2001 Milo Junior Tennis Cup and Regional Workshop sa Burnham Park claycourts.

Iniuwi ni Tangalin ang korona sa boys’ 12-under division habang ibinulsa ni Cortez ang boys’ 16-under bracket at makisosyo ng eksena kina Gerard Ngo, Ronel Tan, Carlo Manalastas, Erika Roc, Angel Ngo at Nikki Antolin sa girls’ 12-under.

Tinalo ni Gerard si Patrick Arevalo, 6-3, 6-4 para sa unisex 10-under; nakapaghiganti naman si Tan kay Darwin Rivera, 6-0, 6-1 sa boys’ 14-under; nanaig si Manalastas kay Dino Ferrari, 7-5, 6-3 sa boys’ 18-under at dinaig ni Roc si Sharlyn Nolasco, 6-2, 6-2 sa girls’ 14-under.

Ginapi naman ni Angel si Merlen Andres, 6-2, 6-3 upang mapagwagian ang girls’ 16-under at bumalik para naman patalsikin si Maureen de Castro, 6-2, 6-1, upang makopo naman ang girls’ 18-under title sa Milo netfest na inorganisa ng CTW at suportado ng Adidas.

Iginawad nina club officers Miles Dugayen at Bob Pascual, club officers, Nestle executives Joey Pichay, Jackby Jaime, Flor Flores, Roland Idos at ang panauhin na si Edgar Avila ang tropeo sa mga nagwagi.