Pormalidad sa quarterfinals asam ng Purefoods

Makalapit sa twice-to-beat advantage ang layunin ng San Miguel Beer habang pagpopormalisa ng pagpasok sa quarterfinals ang puntirya ng Purefoods TJ Hotdogs, Barangay Ginebra at Batang Red Bull.

Sa pagpapatuloy ng umiinit na eliminations ng PBA All-Filipino Cup, mag-sasagupa ang TJ Hotdogs at Gin Kings sa pambungad na laban sa ganap na alas-5:15 ng hapon sa PhilSports Arena.

Kasunod nito ay ang tampok na engkuwentro ng Red Bull Thunder at SMBeer sa dakong alas-7:30 ng gabi.

Bukod sa makakalapit sa top four na mabibiyayaan ng bentaheng twice-to-beat sa quarterfinals phase kung saan ang no. 1 ay haharap sa no. 8; no. 2 vs no. 7; no. 3 kontra no. 6 at no. 4 vs sa no. 5, may iba pang importansiya ang panalo ng SMB.

Sa pamamagitan ng kanilang tagumpay, mapapahigpit ng San Miguel ang kanilang kapit sa ikalawang puwesto, makakabawi ito sa kanilang 76-78 pagkatalo kontra sa Thunder noong Pebrero 28 at makabangon sa nakaraang 71-79 pagkatalo kontra sa Purefoods TJ Hotdogs noong Linggo.

Hawak ng Beermen ang 7-4 kartada sa likod ng nangungunang Shell Velocity na may 9-3 panalo-talo at nakakasiguro na ng twice-to-beat advantage. Ang Red Bull ay may 6-5 record tulad ng Ginebra at walang larong Pop Cola Panthers.

Naging masaklap naman sa Thunders ang kanilang naging karanasan sa kanilang pagdayo sa Malolos, Bulacan sa isang out-of-town game kontra sa Sta. Lucia Realty.

Bukod sa nalasap na 85-95 pagkatalo kontra sa Realtors, napagnakawan din ang buong koponan sa kanilang tinutuluyang Barcie International Center.