Osaka Iridology at ML Kwarta, nagsosyo ng liderato sa CBL President's Cup

CEBU CITY--Kapwa tinalo ng Osaka Iridology at ML Kwarta Padala ang kani-kanilang kalaban sa magkahiwalay na laro kahapon upang magsosyo sa liderato ng 2001 CBL President’s Cup sa New Cebu Coliseum dito.

Kumana si Raymond ‘Magsy" Magsumbol ng krusiyal na jumper sa huling maiinit na segundo ng labanan upang ibangon ang Osaka Iridology sa 75-72 panalo kontra Chariot Econo.

Sumandig naman ang ML Kwarta Padala sa 11-0 rally sa huling anim na minuto upang itakas ang 61-57 come-from-behind na panalo kontra Guardo Shiatsu.

Lamang ang Econo Cabs sa 67-61 patungong 4:41 ng laro nang simulan ni Bernzon Franco ang malaking atake na nag-ahon sa Iridologists sa 69-67 pangunguna patungong 3:06 segundo ng labanan.

Huling nagtabla ang dalawang koponan sa 72-all kung saan kinuha na ng tuluyan ng Osaka ang trangko sa 73-72.