Friendship Games, inindorso ng sports leaders

DAVAO CITY--Nagkakaisang inindorso ng Mindanao government at sports leaders ang pagho-host ng kauna-unahang Friendship Games bilang initial na proyekto para mapagtibay ang kanilang plano at proposals sa rehiyon ang kauna-unahang sports summit na naging matagumpay ang pagtatapos.

Upang matupad ang kanilang pangarap, isa sa major resolutions na inampon ng mga summit delegates ay ang pagbuo ng Mindanao Sports Council na bubuuin ng mga kinikilalang sportsmen at women sa rehiyon na siyang mangangasiwa at makikipag-koordinasyon sa council.

Nagkasundo rin ang delegasyon sa pagrekomenda sa Philippine Sports Commission na siyang nag-organisa ng dalawang araw na kunsultasyon na siyang mag-appoint sa council. Nagpahayag na ng interes ang Davao City at Lanao del Norte na gawin sa kanila ang nasabing Friendship games na nakatakda sa kaagahan ng Hulyo.

Ang iba pang vital resolutions na inampon sa summit ay kinabibilangan ng pagtatayo ng Mindanao Sports Academy o kaya’y Institute na magsisilbing training at education center for sports ng rehiyon.