Pagpasok sa finals asam ng St. Francis at Colegio de San Lorenzo

Tangka ng St. Francis of Assisi College at ng Colegio de San Lorenzo na itakda ang kanilang titular showdown sa kanilang nakatakdang pakikipaglaban sa lower half ng Final Four playoffs ngayon sa 8th McDonald’s-National Capital Region Athletic Association (NCRAA) seniors basketball championship sa Lyceum Gym.

Haharapin ng Doves na siyang No. 1 ang Olivarez Sea Lions (No. 4) sa alas-11 ng umaga, habang magtitipan naman ang Griffins (No. 2) at ang Lyceum Pirates sa alas-12:30 ng tanghali.

Kapwa hawak ng St. Francis at ng San Lorenzo ang bentaheng twice-to-beat makaraang okupahan ang unang dalawang puwesto sa eight-team semifinals round.

At dahil sa bentaheng ito, kumpiyansa naman si coach Moises Kallos ng San Lorenzo na makakayang tapatan ng Griffins ang anumang pressure na ibibigay ng kalaban.

"We’re ready to the challenge. Gutom ang team sa korona, and this is our chance na makagawa ng history sa team record’s," wika ni Kallos.

Sa women’s division, maglalaban naman ang Lyceum at San Lorenzo sa alas-8 ng umaga, bago susunod ang upakan sa pagitan naman ng defending champion De La Salle-Manila at ng Rizal Technological University sa alas-9:30.