NBL Presidential Cup di-dribble ngayon

At dahil sa hangarin nilang madeveloped ang mga kabataang manlalaro, ididribble ngayon ng National Basketball League (NBL) ang kanilang Presidental Cup kung saan unang sasabak sa aksiyon ang Fedex-Philippine Youth team kontra Healthy Options-College of St. Benilde sa San Juan Gym.

Nakatakda ang sagupaan sa dakong alas-2 ng hapon.

Ang naturang laro ay magsisilbing preparasyon ng mga inaasahang magiging miyembro ng national team para sa susunod na taong Asian Basketball Confederation Championships.

Nakakuha naman ng bye ang Bell Corp./San Sebastian College, Chanvello 900/University of Manila, JasPage 1441/Lyceum College at ang Plasterglass/Olivares College-Polytechnic University of the Philippines.

Inanyayahan na dumalo sa isang simpleng seremonya si NBL president Christian Tan, commissioner Fritz Gaston, Basketball Association of the Philippines secretary general Graham Lim at BAP auditor Tony Fabico.