35 teams lalahok sa Tot Baseball NCR tourney

Aabot sa kabuuang 35 koponan mula sa 15 magkakaibang paaralan at clubs sa NCR Region ang lalahok sa pitong kategorya sa pagbubukas ng Tot Baseball National Capital Region (NCR) tournament bukas sa alas-9 ng umaga sa Marist School Grounds sa Marikina City.

Ang opening ceremonies ay dadaluhan nina Philippine Sports Commission (PSC) Chairman Carlos "Butch" Tuason, Marist School president Bro. Manny de Leon, FMS, Philippine Tot Baseball Foundation (PTBF) chairman at Makati vice-mayor Edu Manzano, PTBA president Rodolfo "Boy" Tingzon Jr., at PABA president Hector Navasero.

Ang naturang tatlong buwang tournament ay nakakuha ng buong suporta mula sa PSC ay mayroong pitong kategorya ang Pinto (7-8 yrs.old), Mustang (9-10), Bronco (11-12), Pony (13-14), Boys High School (15-17) at ang bagong dagdag na Girls Grade School maging ang Girls High School baseball.

Ayon kay Tingzon, matapos ang NCR tournament, ito ay dadako naman mula sa North sa Pampanga at sa South sa Lipa City, Batangas.