160 ka kalapasan natala sa LTO-7

CEBU, Philippines — Nakarekord ang Land Transportation Office (LTO) 7 og 160 ka kalapasan sa balaud sa trapiko sa duha ka adlaw nga gipakusgang operation nga gihimo sa mga lungsod sa lalawigan sa Sugbo niadtong Hulyo 23 hangtod 24, 2026.

Ang operasyon, nga gipangulohan ni LTO-7 Regional Director Atty. Wendel C. Dinglasan, misangpot sa pagkadakop sa tulo ka wala marehistrong sakyanan ug duha ka colorum van. Upat usab ka sakyanan ang gi-impound tungod sa paglapas sa mga balaod sa transportasyon.

Sumala sa LTO-7 sa ilang Facebook post, ang mga kalapasan naglangkob sa 37 ka kaso ubos sa Republic Act (RA) 4136 o Land Transportation and Traffic Code; 71 ka kaso ubos sa RA 8750 o Seat Belts Use Act; ug 47 ka kaso ubos sa RA 10054 o Motorcycle Helmet Act.

Matud ni Dinglasan, kabahin ang gipakusgang kampanya sa pagpatuman sa balaod sa padayon nga paningkamot sa ahensya sa pagsumpo sa mga ilegal nga sakyanan sa kadalanan.

Giingon sa LTO-7 nga ipadayon nila ang susamang enforcement operations sa tibuok Central Visayas isip kabahin sa ilang pasalig sa pagpasiugda og mas luwas, disiplinado, ug masinugtanon sa balaod nga mga kadalanan. (BANAT NEWS)