Negosyante natagpuang tadtad ng saksak!
MANILA, Philippines — Natagpuang tadtad ng mga saksak at nabubulok na ang katawan ng isang 35-anyos na rice trader sa isang maisan matapos maiulat ang pagkawala nito, sa Brgy. Barahan, Sta Cruz, Occidental Mindoro nitong Biyernes ng umaga, ayon sa ulat kahapon.
Kinilala ang nasawing biktima na si John Edmon Tardio, isang negosyante ng bigas sa nasabing bayan.
Sa ulat ng Occidental Mindoro Provincial Police Office (PPO), dakong alas-9:39 ng umaga nang matagpuang patay ang biktima sa nasabing lugar.
Ayon kay P/Lt. Col. Xelacor Marie Garcia, spokesperson ng Occidental Mindoro PPO, ang biktima ay tadtad ng malalalim na saksak sa iba’t ibang bahagi ng katawan ng marekober ang bangkay nito.
Dalawa namang Persons of Interest (POIs) na pawang kakumpetensyang rice trader ni Tardio ang sinisilip ng pulisya sa kasong ito kaugnay ng kanilang posibleng kinalaman sa krimen.
Ang biktima ay iniulat ng misis nito na nawawala sa mga awtoridad noong Oktubre 28 matapos na mabigong makauwi ng kanilang tahanan.
Nabatid pa na huling nakitang buhay ang biktima na sakay ng kaniyang motorsiklo matapos umanong makipag-inuman sa dalawang POI.
Sinisilip din ang posibleng anggulo ng pagnanakaw sa krimen dahil may dala umanong P100,000 ang biktima na pambili ng palay nang araw na siya ay mawala.
- Latest
