Rehab center sa lungsod sa Pinamungahan hayan magamit na

CEBU, Philippines — Gilauman sa Kagamhanan sa Probinsiya sa Sugbo nga maablihan sa katapusang quarter sa 2026 ang New Life Rehabilitation Center sa Pinamungajan, nga nagpabiling wala magamit sulod sa hapit pito ka tuig.

Ang pasilidad giturn-over sa Globe Telecom ngadto sa provincial government niadtong 2019 aron gamiton isip treatment ug rehabilitation facility alang sa mga tawo nga adunay substance dependence.

Sumala kang Capitol Health Consultant Dr. Nikki Catalan-Vizcayno, padayon ang pagpangandam sa pasilidad aron matuman ang mga kinahanglanon sa dili pa kini mahimong fully operational.

“Ah, so, hapit na gyud kaayo ta,” matud niya, samtang iyang gipatin-aw nga usa sa mga hagit karon mao ang pag-finalize sa mga personnel nga mangulo ug mo-operate sa pasilidad.

Apil sa ilang gikonsiderar ang gidaghanon sa personnel ingon man ang tukmang staffing arrangement alang sa operasyon sa rehabilitation center.

Sa unang hugna sa operasyon, mga lalaki lamang ang dawaton sa pasilidad ug magsugod kini sa 25 ka beds. Gitarget sa probinsya nga hinay-hinay nga palapdan ang kapasidad samtang gi-assess ang manpower ug operasyon niini.

Giatiman usab sa provincial government ang mga kinahanglan nga physical improvements sa building. Lakip na ang pag-ayo sa kural nga giingong ubos ra alang sa usa ka treatment ug rehabilitation facility.

Niadtong Oktubre 6, nagpahigayon og pre-construction conference ang mga opisyal ug personnel sa Provincial Health Office, Provincial Engineering Office ug Dr. Jose Ma. V. Borromeo Memorial Hospital, uban sa representante sa A.T. Dumlao Construction.

Gawas sa building requirements, kinahanglan usab nga makompleto sa mga personnel ang mga certification ug training nga gikinahanglan alang sa pagtrabaho sa usa ka treatment ug rehabilitation facility.    MEL BANAT NEWS