Cale88 na konektado kay Mans nagsara ng 2 bank account
Habang nililitis si VP Sara
MANILA, Philippines — Sa kasagsagan nang mainit na impeachment trial ni Vice President Sara Duterte, dalawang bank account ng Cale88 Foods Corp., kumpanyang pag-aari ng kanyang asawang si Atty. Manases “Mans” Carpio, ang isinara noong Hulyo 2026.
Kinumpirma ni Security Bank Branch Banking Group Head Leslie Cham sa pagtatanong ni Senator-Judge Kiko Pangilinan na may dalawang peso checking account ang Cale88 na binuksan noong Agosto 2024 at Oktubre 2025, ngunit kapwa isinara noong Hulyo 2026. Nasa P332,530.95 at P21,164.27 na lamang ang natitirang balanse ng mga account nang isara ang mga ito.
Binigyang-diin ni Pangilinan na binuksan ang mga account habang nakaupo na bilang Bise Presidente si Duterte at isinara habang dinidinig ang impeachment case laban sa kanya.
Lumutang din sa pagdinig ang ulat ng Anti-Money Laundering Council (AMLC) hinggil sa tinatayang P319 milyong transaksyon mula sa China na may kaugnayan umano sa Cale88.
Ayon kay Cham, P332,530.95 na lamang ang closing balance ng unang account habang P21,164.27 naman ang natira sa ikalawang account.
Kinuwestiyon naman ni Senate President Win Gatchalian ang 12 cash deposit na iniulat ng Security Bank bilang kahina-hinalang transaksyon. Ayon sa bangko, hindi umano nakapagsumite ang kumpanya nang sapat na dokumento upang maipaliwanag ang pinagmulan at layunin ng mga transaksyon at hindi rin ito tumugon sa mga request para sa paglilinaw.
Samantala, ibinunyag ni Senator-Judge Raffy Tulfo na umabot sa P40.14 milyon ang kabuuang pumasok sa account ng Cale88 noong 2024 habang P40 milyon naman ang lumabas, indikasyong halos lahat ng pondo ay nailabas din sa loob ng parehong taon. Mayroon ding mahigit P6.26 milyong pumasok sa account noong 2025.
Tinanong niya si Cham kung maaaring balewalain ng mga bank manager ang Know-Your-Customer (KYC) requirements kapag may mataas na opisyal ng bangko na nag-utos na tanggapin ang deposito ng isang kliyente.
Iginiit naman ni Cham na mahigpit na ipinatutupad ng Security Bank ang KYC at compliance rules at walang kliyenteng pinapayagang makalusot sa itinakdang proseso ng pagsusuri.
- Latest
