Kapolisan sugod na pagpangandam sa sinulog 2027

CEBU, Philippines — Sugdan na sa Cebu City Police Office (CCPO) ang pagpangandam alang sa seguridad sa 362nd Fiesta Señor ug Sinulog 2027.

Matud ni Police Lieutenant Colonel Gerard Ace Pelare, deputy city director for operations sa CCPO, padayon pa nilang giila ang mga security issue nga nasinati sa miaging Sinulog ug ang mga angay nga adjustment alang sa umaabot nga selebrasyon.

“Naa tay mga gi-introduce nga mga security adjustment based on what happened last year. Kining among pagpangandam mahitabo na on a weekly basis until the Sinulog,” matud ni Pelare.

Atol sa 2026 Fiesta Señor ug Sinulog, kapin 6,500 ka mga polis ug ubang uniformed personnel ang gipakatap alang sa security operations.

Lakip niini ang 2,816 ka personnel gikan sa Philippine National Police (PNP), 145 ka bombero gikan sa Bureau of Fire Protection (BFP), 100 ka personnel gikan sa Philippine Coast Guard (PCG), 637 ka miyembro sa Philippine Army, 324 ka jail officer gikan sa Bureau of Jail Management and Penology (BJMP), 20 ka medical staff gikan sa Department of Health (DOH), 324 ka traffic enforcer gikan sa Cebu City Transportation Office ug 603 ka force    multiplier.

Alang sa 2027 nga selebrasyon, padayon usab nga gibantayan sa CCPO ang pagpangandam alang sa deployment samtang nakigtambayayong sa mga concerned unit ug ahensya.

Samtang, nakigmiting si CCPO chief Police Colonel Ricky Sumalde sa mga representante sa National Commission on Muslim Filipinos (NCMF) Visayas Regional Office niadtong Lunes aron hisgutan ang security coordination alang sa Sinulog 2027.

Matud sa CCPO, nagpahayag ang NCMF sa ilang kaandam nga motabang sa pagmintinar sa seguridad sa Metro Cebu ug makig-coordinate sa mga awtoridad bahin sa posibleng mga concern nga mahimong makaapekto sa selebrasyon.