EDITORYAL — Pagpahiuli sa pagsalig Gikan sa pahina 1

Sama nalang sa politika karon nga puno sa kagubot ug pagkabahin-bahin, daghang mga tawo ang lagmit nga magpabilin sa kun unsay ilang mga gituohan.

Nga kung ang media dili gani motaho sa kung unsa ilang gustong madungog, o motaho sa dili nila gustong madungog, lagmit silang mangita og ubang mga tinubdan nga mohaom sa ilang gusto, bisan kung kini dili tinuod o sayop. Unya ilang ipasangil nga ang media maoy dili kasaligan ug bakakon.

Apan dili lang kini maoy nahitabo. Usahay gamiton pa gyud sa uban ang imahe o pangalan sa media para magpakatap og mga bakak.

Aduna nay mga himan paghimo og mga unod o content nga ilang ipresentar nga kunohay gikan sa lehitimong mga organisasyon sa mga tigbalita apan ilang tuison ang kamatuoran para mogawas nga ang lehitimong media, mga bakakon.

Mabuhat na nila kini pinaagi lang sa pagbutang og sayop nga pahayag sa litrato gikan sa usa ka lehitimong tinubdan sa balita unya pagbutang sa logo sa maong organisasyon sa balita, nga daw gikan gyud lehitimong media outlet ang sayop nga balita.

Daghan na ang makamaong mogamit sa teknolohiya lakip ang artificial intelligence nga lisod mailhan kung tinuod ba kini o dili.

Kaning tanan walay laing tumong kondili ang pagsabwag og kalibog, pagguba sa reputasyon, pagpakatap og mga bakak, o pagrepresentar sa usa ka butang, naratibo o ideya nga maoy gusto nilang mahitabo o madungog.

Maong dili na ikatingala nganong nikubos ang pagsalig sa uban ngadto media tungod aning hinay-hinay nga pagguba sa imahe niini.

Ang atong hagit karon mao ang pagpahiuli sa maong pagsalig. Samtang daghan kanamong mga tigbalita ang nakabatyag aning nagkawala nga pagsalig sa dili makiangayon nga paagi, amo gihapong giisip nga among katungdanan ang pagpahiuli niini.

Ang yawe, mao ang pagpabiling matinud-anon sa iyang papel sa katilingban ang media karong modernong panahon, pinaagi sa padayung paghatud og tukma nga mga impormasyon kay karong panahona dali kaayong motuo ang ubang mga tawo ug mopaambit dayun sa ilang nakita bisag wala pa nila nasusi kung tinuod ba o bakak.

Sa pagbuhat niini, masiguro nato nga ang mga gustong motuis sa kamatuoran mapakyas sa ilang dautang mga katuyoan.

Ang Prensa wala sukad moatras gikan sa usa ka hagit. Nakalahutay man gani bisan niadtong panahong giisip nga labing mangitngit nga bahin sa atong demokrasya nga mao karon atoang gitimaan.