DepEd: Di tinuod nga mag “zero hiring” sa 2027
CEBU, Philippines — Giklaro sa Department of Education (DepEd) ug Department of Budget and Management (DBM) nga walay mahitabong “zero hiring” o hingpit nga paghunong sa pag-hire og mga magtutudlo sa 2027.
Nagkanayon ang duha ka ahensya nga bisan pa man og ang FY 2027 National Expenditure Program (NEP) wala mag-propose sa pagmugna og laing batch sa mga bag-ong Teacher I position, wala kini nagpasabot nga dili mag-hire og mga magtutudlo ang DepEd sa sunod tuig.
Ang gisugyot nga 2027 National Budget naggahin og P31.220 bilyones aron pun-on ang 64,530 ka awtorisadong teaching positions. Niini, 31,614 ang mga bakanteng posisyon na daan nga natala niadtong Abril 24, 2026, samtang ang 32,916 ka posisyon bag-ong gimugna ug giaprobahan sa DBM niadtong Mayo 2026.
Hangtod Septyembre 4, gitaho sa DepEd nga 33,250 ka teaching positions ang napuno na, samtang 25,019 ang nagpabiling bakante. Sa mga posisyon nga bag-ong gimugna ning tuiga lang, 22,649 ang napuno na ug 8,733 ang wala pa mapuno.
Matud ni Education Secretary Sonny Angara, ang pag-hire og mga magtutudlo magpadayon, ug ang prayoridad mao ang pagpuno sa kasamtangang mga bakanteng posisyon ug pag-deploy sa mga kwalipikadng magtutudlo kung asa sila labing gikinahanglan. Ang gisugyot nga badyet nagtagana og P7.582 bilyon alang sa mga substitute teacher, samtang P12.090 bilyon ang gigahin alang sa teacher career progression sa 2027, human sa bag-o lang nga pagpagawas sa P8.68 bilyon alang sa salary differentials ubos sa Expanded CareerProgression (ECP) System. Nalakip usab ang P10.364 bilyones alang sa P10,000 nga Teaching Allowance, P38.782 bilyon alang sa Teacher Benefits, P840.589 milyon alang sa mga non-teaching position, ug P801.583 milyon alang sa school counseling positions.
Gipasabot sa DepEd ug DBM nga ang 14,274 ka dugang nga posisyon sa magtutudlo nga gihangyo kaniadto sa DepEd, nga nagkantidad og gibana-bana nga P4.29 bilyon, lahi sa 64,530 ka posisyon nga duna nay pondo aron pun-on ug mahimong ikonsiderar sa ulahi kung aduna pay dugang nga panginahanglan sa mga kawani. — /IBM (FREEMAN)
- Latest
