Davide usa sa motambag sa impeachment court

CEBU, Philippines — Ang Sugbuanong si retired Chief Justice Hilario Davide Jr. maoy usa sa tulo ka mga kanhi chief justices ug usa ka retiradong associate justice nga motambag sa Senate impeachment court sa sunod semana kabahin impeachment batok kang Vice President Sara Duterte.

Usa sa gipaabot nga tubagon nga pangutana, kung pila ka boto ang gikinahanglan para makombikto o mapawalay-sala ang bise presidente.

Makauban ni Davide silang retired Chief Justices Artemio Panganiban ug Reynato Puno, ug retired Associate Justice Adolfo Azcuna.

Si Presiding Officer Sen. Chiz Escudero maoy mipili kanila isip amici curiae, o “friends of the court,” base sa ilang credentials, Supreme Court decisions ug legal writings, ilang papel pagporma sa Constitution, u gang ilang “known impartiality,”  matud pang impeachment court spokesperson Reginald Tongol kagahapon, September 11.

Silang Panganiban, Puno ug Azcuna personal nga motambong karong Septembre 16 nga maoy gitakda para paminawon ang ilang tambag isip mga eksperto sa pamalaog.  Si Davide, kinsa dili personal nga makatambong, moduso og legal memorandum nga bashon sa hawanan.

Tabangan nilang upat ang impeachment court  nga maresolba ang apelar ni Sen. Erwin Tulfo sa day one ruling ni Escudero nga ang pagkombikto kinahanglan og 16 ka boto, o two-thirds sa tanang 24 ka senador.

Gikwestyon ni Tulfo kung ang 24-member sa Senador magpabiling basihanan, samtang upat ka senator-judges ang wala moapil o makaapil sa trial nga mao silang Sen. Loren Legarda, nga karon nag medical leave sa abroad; Sen. Ronald “Bato” dela Rosa, nga wanted sa International Criminal Court; ug silang Senador Jinggoy Estrada ug Rodante Marcoleta, nga parehong nangapriso tungod sa mga kasong plunder.

Ang pagpaubos sa voting threshold gikan sa 24-member base, nagpasabot nga gamay ra nga boto para pagkombikto o pag-abswelto ang gikinahanglan.

“When we refer to all members, who exactly are we counting?” pangutana pang Tulfo adtong nakalabay nga adlaw’ng Martes.

Matud pang Tongol ang tulo sa upat nakaserbisyo isip mga Chief Justices sa Supreme Court, unya kani silang Davide ug Azcuna parehong mga framers sa 1987 Constitution.

Matud ni Tongol, si Azcuna lang ang nag-inusarang associate justice sa grupo giapil tungod siya man maoy vice chair sa Constitutional Commission’s committee on accountability of public officers  ug nakaserbisyo sab isip  vice chair ni Davide sa committee on the legislative.

Ang impeachment court wala masayud kung unsa ang baruganan aning mga retiradong justices sa isyu sa vote threshold, matud pang Tongol.

Kaning upat, wala sad igdungog nga niestorya sa mga interbyu ug sa publiko bahin aning maong isyu. Usa ni sa mga nakita sa presiding officer ug senator-judges pagkonsiderar pagpili kanila, dugang pang Tongol.

Matud pang Tongol, parehong gikonsulta ni Escudero ang prosekusyon ug ang depensa sa proseso pagpili og mga eksperto, u gang duha ka habig nihatag sab og informal nga mga sugyot og mga pangalan.

Nidugang sab si Tongol nga posibleng mapun-an pa ning upat nga imbitahon ni Escudero tungod sa hangyo sa ubang senator-judges, apil na sab ang posibilidad nga naay babayeng imbitahon sa amici curiae.

Si Davide mao ang ika- 20 nga chief justice gikan November 1998 hangtud December 2005.  Naila siya sa pag-preside atol sa impeachment trial ni kanhi  presidente Joseph Estrada sugod 2000 hangtud 2001.

Ika-21 sab si Panganiban gikan December 2005 hangtud sa iyang mandatory retirement sa edad nga 70 niadtong December 2006. Nahimo sab siya associate justice  sugod atong 1995. Gipulihan ni Puno si Panganiban isip ika 22 nga chief justice,  gikan December 2006 hangtud sa mandatory retirement niini atong May 2010. Nahimo sab siyang associate justice atong 1993.

Ubos sa iyang pamunoan, ang Supreme Court misagop sa writ of amparo atong 2007 isip remedy batok sa extrajudicial killings ug  enforced disappearances. Niadtong 2018, siya maoy chairman sa Consultative Committee sa panahon ni Duterte para i-review ang 1987 Constitution.

Si Azcuna natudlong associate justice sugod October 2002 hangtud February 2009. Delegado siya sa 1971 Constitutional Convention ug miyembro sa 1986 Constitutional Commission.

Nahimo sab siyang presidential legal counsel ni kanhi Presidente Corazon Aquino, press secretary ug spokesperson.— Gikan sa Philstar.com/IBM BANAT NEWS  BANAT NEWS