Problema sa pagtrabaho sa CCMC tukion sa executive session

CEBU, Philippines — Magpatawag og executive session si Konsehal Dave Tumulak aron hisgutan ang nagkadugay nga kontrobersiya sa Cebu City Medical Center (CCMC) lakip ang pag-review ug opisyal nga pag-terminate sa mga kontrata sa Phase I hangtod Phase IV aron makapadayon ang Phase V sa proyekto.

Suma ni Tumulak gikinahanglan ang maong lakang human nasayran nga ang unang upat ka hugna sa konstruksyon adunay mga isyu sa pag-terminate sa kontrata, nag-overlap ang ubang scopes of work ug substandard nga engineering installations nga nakababag sa kasamtangang kontraktor.

Gisaysay ni Tumulak nga ang CCMC gitukod pinaagi sa daghang construction phases sulod sa kapin usa ka dekada human sa magnitude 7.2 nga linog sa Bohol niadtong 2013 diin apektado ang Sugbo.

Ang Phase I gisugdan niadtong 2015 ubos sa C.E. Padilla Construction nga nagkantidad og P514,972,345.1 ug nipagawas ang City Engineer og “Certificate of Final Acceptance for Phase I” niadtong Nobiyembre 29, 2023 ug nga aduna kini satisfactory completion niadtong April 24, 2019.

Sunod niini ang Phase 1.1 alang sa Interior Masonry Works ug Mechanical, Electrical, Plumbing and Fire Protection (MEPF) works sa ikalima ug ikaunom nga andana sa kantidad nga P36,196,753.70 nga adunay napirmahang construction agreement niadtong Hunyo 4, 2020. Gipadayon gihapon sa C.E. Padilla Construction ang Phase II nga nagkantidad og P283,495,715.25 samtang ang Phase III nga nagkantidad og P99,898,060.32 nga gihatag sa C.B. Garay Philwide Builders.

Ang labing dako nga kontrata mao ang Phase IV nga gi-award ngadto sa M.E. Sicat Construction, Inc. / AVECS Corporation (Joint Venture) niadtong Marso 8, 2022 ug nagkantidad kini og P907,999,869.74, apan kini gi-terminate sa kagamhanan niadtong Enero 20, 2023 human maobserbahan ang dakong kalangan sa proyekto.

Ang Phase V, gihatag ang kontrata sa Dakay Construction and Development Corporation niadtong Hunyo 2025 aron mahuman ang nahibiling trabaho. Gipunduhan ang maong hugna og P683,938,459.86.

Apan bisan adunay Notice to Proceed, wala pa makapadayon ang Dakay Construction sa MEPF works human makakita og mga depekto sa kasamtangang estruktura.

Ang Dakay Construction nagpadala og suwat ngadto kang Mayor Nestor Archival niadtong Hulyo 13, 2026 ug ilang giingon nga adunay substandard ug depektibong busduct system nga nagkinahanglan una og giya gikan sa Commission on Audit (COA) sa dili pa ipadayon ang trabaho.

Gibanabana nga mokabat og P403,413,270 ang gikinahanglan aron makorhian ang mga depekto gikan sa ground floor hangtod sa ikatulong andana.

Dugang ni Tumulak nga kon mapamatud-an ang mga kakuwang sa miaging mga kontrata, posible nga adunay mas lawom nga imbestigasyon nga ipahigayon aron masayran ang responsibilidad sa mga nalambigit sa dugay nang nalangan nga proyekto sa CCMC. (BANAT NEWS)