Pangulong Marcos, hindi nilaglag si Romualdez – Palasyo

MANILA, Philippines — Nilinaw ng Malacañang na walang “nilalaglag” si Pangulong Ferdinand Marcos Jr. kaugnay ng kontrobersiyang flood control scandal na kinasasangkutan ng kanyang pinsan na si dating House Speaker Martin Romualdez.

Ayon kay Palace Press Officer Claire Castro, hindi tama ang paggamit ng salitang “nilaglag” ng mga kritiko dahil ang kaso ay nakabatay sa ebidensiyang nakalap ng Office of the Ombudsman.

“Walang dapat nilalaglag dito, kung ano lang iyong ebidensya na nandidiyan, iyon lang—doon lang tayo bumase. Dahil ang Pangulo po sa mga bagay na ganyan ay neutral, proseso, batas, at walang dapat na gawa-gawang ebidensya,” ani Castro.

Matatandaan na si Romualdez ay dating kaalyado at kabilang sa inner circle ni Marcos bago maaresto dahil sa flood control mess.

Dagdag ni Castro, marami pang nakabinbin na kaso sa Ombudsman na patuloy pang iniimbestigahan at hindi pa nasasampahan ng reklamo.

Samantala, hindi tinukoy ni Castro kung ano ang personal na saloobin ni Pangulong Marcos sa pagkakaaresto ng kanyang pinsan, o kung balak nitong dalawin si Romualdez sa ospital.