CCDRRMO nipasidaan nga dili pa luwas ang Binaliw landfill

CEBU, Philippines — Nipasidaan ang Cebu City Disaster Risk Reduction and Management Office (CCDRRMO) nga ang Binaliw landfill nga gidumala sa Prime Integrated Waste Solutions Cebu Inc. dili pa maisip nga luwas alang sa padayon nga operasyon tungod sa mga kakulangan sa mga aspeto sa pagpawong sa sunog, pagpagawas sa methane gas, kalig-on sa bakilid ug sanitasyon.

Si Engineer Elpidio “Jhun” Tariman, Jr., nga nagrepresentar sa CCDRRMO, nipadayag sa pasiunang assessment sa maong buhatan diha sa konseho sa siyudad diin iyang gitumbok nga kulang ang pasilidad sa basic early warning systems sama sa mga sirena, blinker, babag ug safety signages sa mga lugar nga gidili ang pagsulod.

Gipadayag usab ni Tariman ang mga kabalaka kabahin sa engineer ug naobserbahan ang landfill benching ug ang elevated terrain.

Gihatagan niya og gibug-aton nga nagpadayon nga mga trabaho sa rehabilitasyon, nga nagpasabot nga gikinahanglan ang padayon nga pag-monitor ug pag-verify aron matino kong ang mga lakang alang sa risk reduction measure nakompleto ug gipadayon sa dili pa sugdan ang hingpit ug malungtarong operasyon.

Walay nakitang disinfection area alang sa mga trabahante ug garbage trucks diha sa lugar.

Ang mga konsehal nangutanan sa CCDRRMO kong nakita ba ang mga tubo alang sa pagpagawas sa methane atol sa inspeksiyon.

Ug giangkon ni Tariman nga walay naobserbahan niini diin gidid-an sila sa operator sa pagsaka sa upper section.

Gitaho usab ni Tariman nga ang leachate piping partially connected lang kini ngadto sa retention pond diin makwestiyon ang pagdumala sa hugaw nga tubig.

Naobserbahan usab sa maong executive session ang taas kaayong bundo sa landfill nga gibana-banang moabot sa 100 metros o tukma sa usa ka 33-andana nga building nga makasuyop sa tubig-ulan sama sa espongha ug mahimong hinungdan sa pagkahugno sa bakilid. Nagkauyon ang mga konsehal nga maisip lang nga luwas ang landfill kong matuman ang mga rekomendasyon sa CCDRRMO.

Gipahibalo sa CCDRRMO nga wala kini gilakip sa multipartite monitoring team nga gimando sa Environmental Management Bureau (EMB).

Gisaway sa mga konsehal ang EMB-7 ug DENR-7 tungod sa wala pagtambong bisan pa sa mga imbitasyon ug gihulagway ni Konsehal Pastor “Jun” Alcover ang ilang wala pagtambong isip usa ka pagbalewala ug giawhag ang konseho nga mopasaka og reklamo ngadto sa Kongreso.

Sa laing bahin, gipasabot ni Prime Waste Manager Niño Abellana nga gibutangan kini og mga liner ug giklaro nga walay mga tapok sa basura ilalom sa gikawot nga lugar diin dili kini tugotan sa EMB.

Matud ni Abellana nga ang compacting measures gipatuman aron ma-maximize ang kapasidad ug gibana-bana nga ang landfill makadawat og hangtud sa 151,000 ka metric tons depende sa lebel sa compaction. Gikan sa The Freeman,BDB BANAT NEWS