Sekyu kisay sa kuryente habang naglalaba
HAGONOY, Bulacan, Philippines — Patay ang isang 38-anyos na security guard matapos makuryente habang naglalaba sa kanilang bahay sa Barangay San Juan, ng nasabing bayan noong Linggo ng umaga, Setyembre 6.
Kinilala ang biktima na si Harry Gagal, residente ng Purok 5, Brgy San Juan, Hagonoy, Bulacan.
Ayon sa pulisya, habang naglalaba si Gagal kasama ang isang saksi na si Cristina Torres nang maganap ang insidente.
Saglit na umalis si Torres para kumuha ng almusal sa bahay ng kanyang mga magulang na malapit lamang sa kanilang bahay at iniwan ang nasabing guwardya.
Ilang sandali ang nakalilipas ay biglang narinig ni Torres ang malakas na sigaw kaya agad siyang bumalik. Nakita niya si Gagal na nakayakap na sa washing machine at nagkikisay hanggang sa bumagsak sa sahig.
Agad namang inilayo ni Torres ang nakuryenteng guwardya at humingi ng tulong sa mga kapitbahay.
Dinala nila si Gagal sa Emilio G. Perez Memorial District Hospital, ngunit idineklara na siyang dead-on-arrival dahil sa matinding dumaloy na botlahe sa katawan.
- Latest
