DOE niprayoridad sa pagpalig-on sa Visayas power grid

CEBU, Philippines — Giprayoridad sa Department of Energy (DOE) ang diha-diha nga pagpalig-on sa Visayas power grid samtang nagpadayon ang rotational power outages nga nakaapekto sa mga komunidad sa rehiyon.

 Kini ang gipadayag ni Energy Secretary Sharon Garin atol sa virtual press conference kagahapon diin iyang giila nga dili na madawat ang kasamtangang sitwasyon sa kuryente sa Visayas. Matud ni Garin nga nakasinati og rotational power outages sulod sa nilabay nga mga adlaw ug semana ang mga komunidad sa Visayas nga nakaapekto sa mga panimalay, gagmay’ng negosyo, ospital, eskwelahan, pabrika ug uban pa’ng importanteng serbisyo.

Gibutyag ni Garin nga prayoridad sa DOE ang pagpasig-uli sa kuryente sa labing dali nga panahon pagdugang og backup capacity ug pagsiguro nga adunay igo nga reserve power ang grid.

 Sa pagkakaron, ang tumong mao ang pagsulbad una sa problema imbes nga magtinudloay kong kinsa ang responsible ug mosunod ang accountability human ma-stabilize ang grid ilabina sa mga power plant o grid operator nga mapamatud-ang nakapahinay sa pagpasig-uli sa kasaligan nga suplay sa kuryente.

Usa sa dagkong hinungdan sa kakulang sa suplay sa kuryente gumikan kay dili operational ang pipila ka generating units.

Gipasabot ni Garin nga kon daghang power plant ang dili magamit sa samang higayon, mawala ang reserve supply nga gikinahanglan sa sestema aron makatubag kong adunay laing generating unit nga kalit nga mohunong. Ug adunay pipila ka generating units nga gipabiling naka-standby aron makahatag og dugang kuryente kong kalit nga mohunong ang laing generator.

Apan kong limitado ang available nga generating units mas dali nga maabot sa grid ang sitwasyon diin dili na igo ang suplay aron matubag ang panginahanglan sa mga konsumidor.  Nakasinati ang Visayas power grid og sunod-sunod nga yellow ug red alerts tungod sa dungan nga pagkadiskonekta o dili operational ang dagkong generating facilities.

Sa nilabay nga mga semana, nagpabiling hugot ang power supply sa rehiyon tungod sa pipila ka planta nga nakaagi og forced o preventive outages. BDB BANAT NEWS