2 BOC personnel kinasuhan sa smuggled yosi raid
MANILA, Philippines — Dalawang tauhan ng Bureau of Customs (BOC) ang kinasuhan ng Philippine National Police-Highway Patrol Group (PNP-HPG) matapos madatnan sa sinalakay na warehouse sa Bulacan kung saan nakumpiska ang mga smuggled na sigarilyo.
Sa pitong pahinang reklamo, isinama ni Police Corporal Melvin Habbiling ang sinumpaang affidavit ng umano’y middleman na si Jesus Froilan Acebes Carpiso.
Tinukoy ni Carpiso sina BOC Special Agent Lucky Joy “Joy” Solmayor at BOC Technical Support Staff Alexander “Alex” Arroyo Jr. bilang kabilang sa mga nadatnan sa raid.
Inihirit sa reklamo na maisailalim sa preliminary investigation sina Solmayor, Arroyo, at Jocelyn Miano Bancairen para matukoy ang probable cause at maisyuhan ng subpoena.
Sa kanyang salaysay, sinabi ni Carpiso na nakita mismo sina Solmayor at Arroyo sa warehouse nang isagawa ng Regional Highway Patrol Unit-NCR ang operasyon.
Positibo ring tinukoy ni Carpiso ang dalawang BOC personnel na tumanggap ng kabayaran kapalit ng 225 boxes ng smuggled Red Carnival cigarettes sa entrapment operation noong Agosto 19.
Ayon kay Carpiso, siya ang nagsilbing middleman sa bentahan ng mga smuggled na yosi.
Sinamahan pa umano niya si Solmayor sa warehouse kung saan nakatagpo nila si Arroyo bago dumating ang mga otoridad para sa raid.
Sa panayam, sinabi ni Customs Commissioner Ariel Nepomuceno na hindi niya kilala ang mga alyas “Joy” at “Alex” na sangkot sa raid.
Ngunit batay sa BOC memorandum na may petsang Agosto 20, tinukoy sina Solmayor at Arroyo bilang Special Agent I at Administrative Aide I mula sa Customs Intelligence and Investigation Service-Intelligence Group.
Sila rin ang kabilang sa naghanda ng incident report kaugnay ng Bulacan raid.
- Latest
