CECABA All Stars, Toyota Mandaue gisubhan og daog

CEBU, Philippines — Ang Cebu Eastern College Alumni Basketball Association (CECABA) All Stars nga gipangulohan ni Chester Cokaliong misikad sa ilang kampanya uban ang 112-97 nga paglampaso sa Monday Hoopers-Anry Graphics, 112-97, pagsugod sa 1st Edgar Cokaliong Memorial Cup Basketball Tournament nga gipaluyohan sa Shell Pilipinas Corporation niadtong Miyerkules sa gabii, Agosto 26, sa Don Edgar Stadium sa Cokaliong Tower.

Sa edad nga 65 anyos, si Cokaliong mipakita sa way pagbahar nga kahait sa iyang tinirahan pinaagi sa paglansang og napu ka 3-pointers dayon na ngadto sa pagkadlit og 30 puntos alang sa Shell-backed CECABA stars.

Mikuha sab og atensiyon si Mark Eugene Bukiron nga mibubo og 21 sa iyang 32 puntos sa second half.

Sila si Cokaliong ug Bukiron nagkumbinar og 20 puntos sa unang kuwarter aron ituboy ang  Easternians ngadto sa 31-25 nga bentaha, nga ilang giinat ngadto sa 59-48, sa halftime.

Si BJ Zosa midugang og 17 puntos alang sa CECABA, nga miposte og 15 puntos nga labaw, 88-73, human sa tulo ka kuwarter nga ilang namintinar hangtud sa katapusang gutlo sa duwa.

Si Nario Salibay maoy nangu sa pito ka players sa Monday Hoopers nga mirehistro og double digits uban ang 21 puntos.

Si Mark Apa milansang og 19 puntos, sila si Loling Abella ug Raj Advani nagkumboya'g 25 puntos, samtang sila si Kyle Dizon, Roi Mata, ug Oliver Yguinto mihipos og 10 puntos matag usa sa pildirong kawsa.

Sa laing resulta, ang Toyota Mandaue North nalihian sab og daog human sila nakapisot sa Wednesday Club ni Ed Tabz.

Si JP Batac ang bida sa Toyota Mandaue bitbit ang 19 puntos samtang sila si Ken Estenzo ug Jaymar Gapo mitali og 11 ug 10 puntos. Si Alvin Bustos mipabuto og 20 puntos ug si Jonel Camboanga mibirada og 18 puntos apan sa way kapuslanan alang sa Wednesday Club.

Mga iskor

Unang duwa

CECABA All Stars (112) — Bukiron 32, Cokaliong 30, Zosa 17, JJ Yu 9, De Teves 8, Gabatan 7, Tan 4, R. Yu 2, Magno 2, Bauya 1

Monday Hoopers (97) — Salibay 21, Apa 19, Abella 14, Advani 11, Yguinto 10, Mata 10, Dizon 10, Eriso 2 Quarterscores:31-25;58-49;88-73;112-97

Ikaduhang duwa

Toyota Mandaue North (73) —  Batac 24, Estenzo 11, Gapo 10, Espinosa 8, Co 7, Soco 6, Esremos 4, Lao 3

Wednesday Club (71) —  Bustos 20, Camboanga 18, Young 9, Viliran 8, Tabz 7, Stella 4, Ceballos 3, Amora 2

Quarterscores:21-13;42-32;62-52;73-71.