Duha ka lalaki nakuhaag armas

CEBU, Philippines — Duha ka lalaki ang nadakpan sa managlahing insidente sa Carcar City ug Liloan, Cebu tungod sa giingong paglapas sa Republic Act 10591 o Comprehensive Law on Firearms and Ammunition Regulation Act.

Sa Carcar City, nadakpan alas-12:40 sa kaadlawon niadtong Agosto 23, 2026 ang 55-anyos nga si alyas Panggo, residente sa Sitio Tapal, Barangay Guadalupe, Carcar City.

Sumala sa kapolisan, nakadawat sila og sumbong gikan sa usa ka concerned citizen bahin sa usa ka tawo nga giingong armado ug nagpakita og wala matinong klase sa armas sa Sitio Danao 2, Barangay Valencia.

Mitubag dayon ang SWAT/Alert Team sa Carcar City Police Station ubos sa direktang pagdumala ni PLTCOL Arwen D.S. Nacional.

Nasakpan sa mga operatiba si Panggo nga adunay armas nga giluklok sa iyang kiliran. Wala usab siya makapakita sa legal nga mga dokumento alang sa l pagdala sa armas.

Nasakmit gikan sa suspek ang usa ka .9mm caliber pistol nga Rock Island Armory, serial number RIA 201608, uban ang usa ka magazine nga adunay unom ka bala.

Gidala ang suspek sa Carcar City Police Station alang sa dokumentasyon ug tukmang legal nga disposisyon.

Samtang sa Barangay Yati, Liloan, usa usab ka 37-anyos nga construction worker ang nadakpan alas-7:46 sa gabii niadtong Agosto 22, 2026 tungod sa giingong paglapas sa RA 10591.

Giila ang suspek nga si alyas Nocos, residente sa Barangay Basak, Compostela, Cebu.

Sumala sa report, alas-7:42 sa gabii nakadawat og tawag ang duty desk officer sa Liloan Municipal Police Station bahin sa usa ka tawo nga giingong nagdala og armas sa Purok Tambis 1, Barangay Yati.

Mitubag sa lugar ang mga pulis ug nakit-an ang usa ka tawo nga mitakdo sa gihatag nga deskripsyon sa suspek. Matud sa report, nakamatikod ang mga pulis og miburot nga butang sa tuo nga bahin sa hawak sa lalaki.

Sa dihang gipataas niya ang iyang kamiseta alang sa verification, nakita ang usa ka .9mm caliber LLAMA pistol, hinimo sa Spain, nga adunay serial number 627153 ug gitago sa iyang hawak.

Gipangayo sa mga pulis ang firearm registration, license, permit o uban pang dokumento alang sa armas, apan wala kini mapakita sa suspek.

Tungod niini, gidakop si Nocos, gawas sa armas, nasakmit usab ang usa ka steel magazine nga adunay unom ka bala ug usa ka brown nga inner holster.

Ang duha ka suspek gidala sa tagsa-tagsa nilang police station alang sa dokumentasyon, verification ug tukmang disposisyon, samtang ang mga nasakmit nga armas ug bala gipailalom sa hustong proseso sa imbestigasyon. — /IBM (BANAT NEWS)