Mas mahigpit na ‘gun storage rules’ isinulong sa Senado
MANILA, Philippines — Isinulong ni Sen. Raffy Tulfo ang mas mahigpit na patakaran sa pagtatago ng mga baril o “gun storage rules” kasunod sa nangyaring pamamaril sa Ateneo de Zamboanga University noong Agosto 18 na ikinasawi ng dalawang estudyante.
Nais ni Tulfo na inspeksyunin muna ng Philippine National Police (PNP) kung may ligtas na paglalagyan ng baril ang isang aplikante bago ito pagkalooban ng License to Own and Possess Firearms o LTOPF.
“Dapat bago mag-issue ng LTOPF ang PNP ay ma-inspect muna nila kung ang licensed owner ay mayroong secured na lugar na mapaglalagyan ng baril niya,” ani Tulfo.
Kinumpirma ng Bureau of Customs (BOC) na isa sa dalawang baril na ginamit ng suspek ay government-issued firearm ng kanyang ama na isang Customs police officer.
Nais din ni Tulfo nang mas mabigat na parusa, kabilang ang pagkakakulong, sa mga lisensiyadong may-ari ng baril kapag nagamit ng ibang tao ang kanilang armas sa labag sa batas na paraan.
Nauna na ring nanawagan si Tulfo ng karagdagang security measures sa mga paaralan, kabilang ang paggamit ng handheld metal detectors ng mga security guard upang makatulong sa pagtukoy ng mga baril at iba pang ipinagbabawal na gamit.
- Latest
