Mikee Romero umayuda sa fire victims sa GenSan

GENERAL SANTOS CITY, Philippines — Pinasalamatan ni Mayor Lorelie Geronimo Pacquiao si dating 1-PACMAN Party-list Rep. Michael “Mikee” Romero at ang 1-PACMAN sa tulong na ipinagkaloob sa mga pamil­yang nawalan ng tirahan dahil sa sunog sa Purok TKT, Barangay San Isidro.

Ayon kay Pacquiao, malaking tulong ang agarang ayuda at ipinangakong construction materials ng grupo para sa muling pagtatayo ng mga nasunog na bahay. Naganap ang sunog dakong alas-8 ng umaga noong Agosto 17 na nakaapekto sa humigit-kumulang 12 bahay at ilang maliliit na negosyo.

Agad na naapula ng Bureau of Fire Protection (BFP) ang apoy sa loob ng 25 minuto. Walang naiulat na nasawi o nasugatan sa insidente. Patuloy naman ang imbestigasyon ng BFP upang matukoy ang sanhi ng sunog.

Pansamantalang inilikas sa barangay covered court ang mga pamilyang naapektuhan habang nagpapatuloy ang pagbibigay ng tulong ng pamahalaang lungsod at mga lokal na opisyal.

Si Romero ay dating kinatawan ng 1-PACMAN party-list sa Kamara sa loob ng tatlong termino at kilala rin sa pagsuporta sa iba’t ibang humanitarian program sa bansa.