Mirisi nga nag-unay
Bisan sa kabalaka sa iyang mga alyado sa politika nga dili pa andam ang iyang anak sa dakong responsibilidad sa pagka bise mayor sa Davao City, niinsistir si kanhi Presidente Rodrigo Duterte sa pagpadagan ug nakumbinser ang mga botante sa pagpadaog ni Sara Duterte niadtong 2007.
Nitagam si Rodrigo nga bisan ang labing suod nga mga sinaligan wala motuman sa tanan niyang sugo sa tanang panahon. Maong nakahukom sa pagsugod sa iyang kaugalingong dinastiya. Naneguro nga si Sara ang mopuli niya kay dili na makadagan pagka mayor sa 2010.
* * *
Tuod man, dihang nipuli na si Sara sa pagka mayor sa 2010, nakat-onan ni Rodrigo nga bisan ang iyang kaugalingong anak dili kadiktahan. Nag-away dayon silang Sara kinsay itudlo nga city administrator.
Gusto ni Rodrigo nga ang iyang naandang grupo ang padayon nga mopadagan sa syudad. Temporaryo ra si Sara kay mobalik man siya pagka mayor sa 2013. Pero niinsistir si Sara sa pagtudlo ni Atty. Zuleika Lopez. Bisan sa pagsupak ni Rodrigo ug sa City Council, nilampos si Sara sa paghimo ni Zuleika nga bag-ong hawod sa City Hall.
* * *
Niulbo ang sunod nilang engkuwentro dayong kapupos sa termino ni Rodrigo pagka presidente. Gisugo niya si Sara sa pagdagan sa pagka presidente sa 2022 aron nga magpadayon ang iyang pagkontrolar sa Malakanyang.
Pero ambot tungod ba kay kumbinsido nga dili pa siya andam sa sa pagpangulo sa tibuok nasud, o wala lang gyoy bilib sa iyang amahan, niuyon si Sara sa pagdagan sa pagka bise presidente ni Ferdinand Marcos Jr.
* * *
Nangampanya si Rodrigo pagpalagpot ni Marcos Jr. pinaagi sa unang Maisug rally sa Davao City niadtong Enero 2024. Naabtan si Sara og pila ka buwan una ni-resign pagka education secretary. Ug laing pila ka buwan una nanaway sa administrasyon.
Ambot nagtuo bang dili magkasinabot ang anak ug amahan, o tapolan lang gyod, naabtan og kapin sa tuig si Marcos Jr. una nipalihok sa makinarya sa gobyerno batok ni Sara. Gawas sa impeachment trial ug kasong kriminal batok ni Sara ug pagpapriso sa iyang mga alyado, ambot unsa pay sunod nga himuon sa administrasyon. Aron pagseguro nga dili makabalik ang mga Duterte sa Malakanyang.
* * *
- Latest
