Cebu Greats milatigo sa Isabela Cowboys

CEBU, Philippines — Ang Cebu Greats milampornas sa Ilagan Isabela Cowboys, 80-52, alang sa ikaupat nilang sagunson nga daog sa Maharlika Pilipinas Basketball League (MPBL) Season 8 niadtong Miyerkules sa gabii, Agosto 12, didto sa Batangas City Coliseum.

Si Mark Meneses maoy nangu sa balanseng opensiba sa Cebu uban ang 14 puntos ug 11 ka rebounds.

Hait kaayo si Meneses nga mipasud siya og unom sa walo niya ka itsa apil ang duha ka 3-pointers.

Si Simon Camacho mi-iskor lamang og sayes puntos apan milangkat og 17 ka rebounds, mipasa og upat ka assists ug miposte og tulo ka blocks sa dihang ang Cebu miinat sa ilang rekord ngadto sa 17-5.

Miamot si Wowie Escosio og 10 puntos samtang sila si Dondon Hontiveros, Elmer Echavez, ug Limuel Tampus nagkumbinar og 25 puntos alang sa Greats, nga wala na molingi pa sukad sila mibulhot sa mainit nga sinugdanan, 24-9.

Ang Cebu misira sa first half  uban ang 39-23 nga labaw, nga ilang giinat ngadto sa 57-38 human sa tulo ka kuwarter sa wala pa sila molahos ngadto sa 28-puntos nga demolisyon. Si Jayboy Solis maoy bugtong double-digit scorer alang sa Isabela bitbit ang 10 puntos. Si nArth De la Cruz mihipos og sayes puntos, 14 ka rebounds ug pito ka assists apan sa way kapuslanan kay ang Cowboys  natagak sa 13-8.