Nganong nagsakit ilang bag-ang?

Ambot nganong nagsakit ang bag-ang nilang Bise Presidente Sara Duterte ug sa iyang igsuon nga si Kongresista Paulo “Polong” Duterte sa hagit ni Defense Secretary Gibo Teodoro ngadto sa mga opisyal sa gobyerno nga mas mipabor sa China kay sa ilang kaugalingong nasud.

Human sa pamahayag ni Teodoro nga nag-awhag sa mga Pro-China nga mga opisyal sa nasud pagluwat sa katungdanan, dali siyang nakadawat og pagsaway gikan sa kongresista. Matud ni Polong nga di husto ang gihimo ni Teodoro nga panawagan. Iyang gihagit ang opisyal nga ikiha ang mga opisyal kun dunay nahimong kalapasan ug hunongon ang “pag-demonize” sa China.

Ang bise presidente misaway sab ni Teodoro ug mihulagway sa iyang panawagan nga dili makiangayon. Gihagit ni Sara ang kalihim nga hinganlan ang mga Pro-China nga iyang gipasabot sa iyang panawagan.

Way sayop sa panawagan ni Teodoro nga moresign ang mga opisyal nga mas gipiling protehian ang interest sa China. Isip Defense Secretary iyang katungdanan ang protehian ang interest sa nasud gikan sa mga opisyal nga traydor.

Ug tingali duna pay nahabiling respito si Teodoro sa mga Pro-China nga mga opisyal hinungdan nga wala niya himoang direkta ang panawagan. Gawas pa wala man sab tingali kinahanglana ang paghingalan nila tagsa-tagsa tungod kay ang publiko nasayod kinsay tua kapusta sa China ug kinsay tinuod nga mga nagmahal sa nasud.

Dayag og tataw sa mga lihok ug pulong sa mga opisyal kun kinsa nila ang mga ulipon sa China ug way uwaw nga nagpabiling midawat og sweldo gikan sa buhis sa mga Pilipino.

Kun wala sila maigo sa panawagan ni Teodoro ug kun sa ilang kasing-kasing mas nagpasuwabi ang pagpangga sa atong nasud way rason nga masakit silang Kongresista Polong ug VP Sara.

Dili pag-demonize sa China ang manawagan sa iyang mga kaubang opisyal sa gobyerno nga pilion ang Pilipinas ug moluwat sa pwesto kun dili nila kini mahimo. Dili ba diay kumbinsido si Kongresista Duterte nga dautan ang gibuhat sa China nga pagpangilog sa atong teritoryo ug ang pagpunay niini og panghasi sa atong mga mangingisda, mga sakop sa Philippine Coast Guard ug kasundalohan?

Kun alang sa kongresista way sayop sa gihimo sa China bisan pila na kahigayon gidasmagan sa Chinese Coast Guard ang atong mga barko, unsa may angayang ihulagway kaniya?