Bossing nakatikim na ng panalo

MANILA, Philippines — Bumangon ang Blackwater mula sa isang 15-point deficit sa third period para patumbahin ang Phoenix, 106-100, at tapusin ang tatlong dikit na kamalasan sa PBA Season 50 Governors’ Cup kahapon sa Smart Araneta Coliseum.

Humakot si import Kentrell Barkley ng 34 points at 16 rebounds para sa 3-3 baraha ng Bossing, habang may 26 at 15 mar­kers sina Sedrick Barefield at RK Ilagan, ayon sa pagkakasunod.

“I’m just happy that we played that well, especially Sedrick. I told him, being the leader of this team he has to step up and he did,” ani coach Patrick Aquino. “Hopefully, we get more wins.”

Bigo ang Fuel Masters na mailista ang ikalawang sunod na ratsada para sa 4-2 marka bagama’t nakahugot kay import BJ Johnson ng 45 points.

Nakaganti rin ang Blackwater sa Phoenix na tumalo sa kanila sa first round, 102-93, noong Hulyo 28.

Matapos kunin ng Bos­sing ang 65-62 abante sa pagsisimula ng third p­eriod ay isang 21-3 atake ang ginawa ng Fuel Masters para iposte ang 15-point lead, 83-68, sa huling 3:23 minuto ng yugto.

Mula sa three-pointer at four-point shot ni Barkley ay nakalapit ang Blackwater sa 77-86 hanggang tuluyan nang iwanan ang Phoenix sa 101-93 sa huling minuto ng fourth quarter.

Nagsalpak ng dala­wang free throws si Ken Tuffin para sa 95-103 paglapit ng Fuel Masters kasunod ang dalawang foul shots ni Barkley sa huling 22.2 segundo para selyuhan ang panalo ng Bossing.

Nag-ambag si Ricci Rivero ng 15 points kasunod ang 12 markers ni Kai Ballungay para sa Phoenix.