21 anyos nakuhaag armas

CEBU, Philippines — Nasikop ang usa ka 21-anyos nga lalaki ug nasakmit gikan kaniya ang usa ka illegal nga .38 caliber revolver ug tulo ka buok nga bala atol sa gipatuman nga search warrant operation sa Cebu City Police Office (CCPO) sa Sitio Mohon, Barangay Sapangdaku, alas 3:30 sa buntag niadtong Biyernes, Hulyo 31.

Ang nadakpan giila nga si Justine Alicaway, nailhan usab isip Justine Dave Zapanta Alicaway, nga giatubang og kasong paglapas sa Republic Act No. 10591 o ang Comprehensive Firearms and Ammunition Regulation Act.

Sumala sa CCPO, ang operasyon gipahigayon sa mga operatiba sa City Intelligence Unit nga gipangulohan ni Police Captain Christopher Irwin Corvera Sanchez Jr., ubos sa direktang pagdumala ni Police Lieutenant Colonel Eunil Balili Avergonzado.

Gipatuman sa mga operatiba ang Search Warrant nga giisyu ni Judge Anacleto G. Debalucos.

Atol sa operasyon, narekober gikan sa suspek ang usa ka .38 caliber revolver nga walay serial number ug tulo ka buok buhing bala sa maong kalibre.

Ang suspek gidala sa Cebu City Detention Facility diin siya temporaryong gitanggong samtang gihikay sa kapulisan ang pagpasaka sa angayng kaso batok kaniya.  BANAT NEWS