Ahente’g yuta gisikop

CEBU, Philippines — Gidakop sa Criminal Investigation and Detection Group (CIDG) ang usa ka 33-anyos nga babaye atol sa entrapment operation sa Aman Building, Barangay Poblacion Oriental, Consolacion, Cebu, niadtong Sabado, Hulyo 11, tungod sa giingong estafa ug paglapas sa Real Estate Service Act.

Ang suspek giila nga si alyas Melanie, residente sa Sitio Pajo, Barangay Ibabao, Mandaue City. Ang operasyon gipahigayon sa CIDG Lapu-Lapu City Field Unit sa koordinasyon sa Consolacion Municipal Police Station ug Cebu Police Provincial Office ubos sa flagship project sa CIDG nga "OLEA."

Base sa reklamo ni Rebecca F. Cassas, mipalit siya og duha ka lote sa Danao City nga nagkantidad og ?1.6 milyon.

Apan bisan nakadawat na og bayad ang mga gireklamo, wala sila makahatag sa Tax Declaration, Deed of Sale ug uban pang mga dokumento nga magpamatuod sa legalidad sa transaksyon ug pagbalhin sa pagpanag-iya sa yuta. Nasayran usab sa imbestigasyon sa CIDG nga ang Felicity Realty, nga gipanag-iya ni Elisa Hayag, wala'y balidong License to Sell ug wala marehistro isip real estate developer o dealer, sumala sa sertipikasyon sa Department of Human Settlements and Urban Development (DHSUD).

Atol sa operasyon, nasakpan ang suspek samtang nagdawat og bayad gikan sa mga kliyente. Dugang pa sa imbestigasyon, nahibal-an usab nga ang mga loteng gibaligya wala nakarehistro sa ngalan sa mga suspek.

Narekober sa mga operatiba ang marked money, mga opisyal nga resibo, ug usa ka Vivo cellular phone nga giingong gigamit sa transaksyon. Gidala ang suspek sa opisina sa CIDG Lapu-Lapu City Field Unit alang sa hustong booking ug disposisyon sa kaso.

Giandam na usab ang mga dokumento alang sa pagsang-at sa kasong estafa ubos sa Article 315 sa Revised Penal Code ug paglapas sa Section 29 sa Republic Act No. 9646 o Real Estate Service Act ngadto sa Cebu Provincial Prosecutor's Office alang sa inquest proceedings.  IBM BANAT NEWS