Koreano gidakop human wala mobayad sa hotel

CEBU, Philippines — Gidakop ang usa ka 49-anyos nga Korean national human siya gipasanginlang milayas sa usa ka hotel sa Cebu City nga wala mobayad sa iyang bayranan ug misulay pa unta'g larga pinaagi sa Mactan-Cebu International Airport niadtong Domingo, Hulyo 12.

Ang suspek giila nga si Chanhong Park, 49, residente sa Asan City, South Korea.

Base sa report sa Police Station 11 sa Cebu City Police Office, ang complainant nga si Kyutae Kim, 43, usa sab ka Korean national,  nga ang suspek mibiya sa hotel ug misaad nga mobalik aron mobayad sa iyang obligasyon.

Apan, imbes nga tumanon ang saad, gituohang milayas kini aron likayan ang pagbayad. Gisundan sa biktima ang suspek ug nasayran nga padulong na kini sa Mactan-Cebu International Airport aron molarga.

Maayo nalang nga naabtan kini ug  gidakop sa mga sakop sa Philippine National Police Aviation Security Group sa wala pa siya makasakay sa eroplano.

Gitugyan dayon ang suspek ngadto sa Police Station 11 diin gipahibalo kaniya ang reklamo batok kaniya. Ang suspek karon gitanggong sa Police Station 11 samtang gipangandaman ang pagsang-at og kasong estafa batok kaniya. Padayon pa ang imbestigasyon sa maong hitabo.  IBM BANAT NEWS