P3B smuggled nga sigarilyo, gikan tanan sa China
CEBU, Philippines — Ang Bureau of Customs (BOC), uban sa National Bureau of Investigation (NBI), gikatakdang gub-on ang kapin P3 bilyones nga kantidad sa mga kontrabandong sigarilyo nga nasakmit sa usa ka dako nga anti-smuggling operation sa Cebu samtang nangandam usab kini sa pagsaka og mga kasong kriminal batok sa mga responsable sa iligal nga shipment.
Ang operasyon nagsugod pinaagi sa intelligence report sa NBI ug gipatuman niadtong miaging bulan human makakuha og search warrant.
Sa kinatibuk-an, 59 ka container vans nga puno sa sigarilyong Modern Gia nga gituohang gihimo sa Changsha, China ang nasakmit gikan sa Gothong Wharf sa Mandaue City, usa ka bodega sa Barangay Bacayan sa Cebu City ug sa Manila Port.
Gipasalamatan ni BOC Commissioner Ariel Nepomuceno ang NBI ubos sa pagpangulo ni Director Melvin Matibag sa impormasyon nga misangpot sa maong malampusong operasyon karong tuiga.
Matud ni Matibag, ilang giandam ang daghang kasong kriminal lakip ang paglapas sa Anti-Agricultural Economic Sabotage Act, Customs Modernization and Tariff Act, National Internal Revenue Code of 1997 ug posibleng paglapas sa intellectual property laws kon mapamatud-an ang dili awtorisadong paggamit sa mga rehistradong brand sa sigarilyo.
Dili lamang ang mga drayber, helper ug guwardiya ang ilang gukdon kondili apil usab ang mga financier, protector ug mga utok sa sindikato. Giimbestigar sab ang consignee ug shipper.
Sumala pa ni Nepomuceno, posibleng gikan sa Taiwan o mainland China ang mga sigarilyo ug gibalhin gikan sa dagkong barko ngadto sa gagmayng sakayan aron makalikay sa hugot nga inspeksiyon sa mga international port. Ang mga nasakmit nga sigarilyo galingon aron di na mapuslan. Gipasalig sa BOC ug NBI nga magpadayon ang koordinasyon sa Philippine Coast Guard, Philippine Navy, Philippine National Police ug uban pang law enforcement agencies aron mapugngan ang pagsulod sa kontrabandong sigarilyo ug mapanubag ang tanang nalambigit sa iligal nga operasyon. (BANAT NEWS)
- Latest
