School Safety Act, posibleng maaprobahan na sa Senado
CEBU, Philippines — Ang gisugyot nga balaod nga nagtumong sa pagpalig-on sa kaluwasan sa mga eskwelahan ug pag-andam sa emerhensiya posibleng maaprobahan sa Senado sulod sa sunod nga duha ka bulan.
Kini human sa hiniusang public hearing niadtong Huwebes nga nagtuki sa nagkadakong kabalaka sa seguridad sa mga eskwelahan.
Si Senador Bam Aquino, chairman sa Senate Committee on Basic Education, maoy nangulo sa hearing nga gitambongan sa mga magbabalaod, ahensya sa gobyerno ug mga representante sa sektor sa edukasyon aron hiusahon ang nagkadaiyang sugyot ubos giduso nga School Safety Act. Gihimo ang hearing human sa sunod-sunod nga mga insidente nga nakapukaw og kabalaka sa seguridad sa mga eskwelahan, lakip ang pagpamusil sa usa ka high school sa Tacloban City nga nikalas og tulo ka tinun-an.
Matod ni Aquino, ang gisugyot nga balaod nagtumong sa pagsiguro nga ang mga eskwelahan magpabiling luwas nga lugar alang sa pagkat-on ug aron masaligon ang mga ginikanan nga luwas ang ilang mga anak sa pagsulod sa eskwelahan.
Ubos sa gisugyot nga omnibus School Safety Act, palig-onon ang seguridad sa sulod ug gawas sa mga eskwelahan pinaagi sa pagpatuman og estandard nga emergency response protocols, pagmando sa paggamit sa closed-circuit television (CCTV) systems, ug pagpalapad sa mental health ug psychosocial support alang sa mga estudyante ug magtutudlo.
Atol sa hearing, gipunting usab ni Aquino ang kakulang sa klarong emergency procedures atol sa pagpamusil sa Tacloban, diin matod niya walay klarong giya ang mga eskwelahan ug mga ginikanan kon unsay angay buhaton sa maong sitwasyon. (BANAT NEWS)
- Latest
