P3 milyong smuggle nga mga sigarilyo sakmit

CEBU, Philippines — Gibana-bana ngadto sa P3 milyones ang kantidad sa mga smuggle nga sigarilyho nga nasakmit samtang duha ka lalaki ang nasikop atol sa buy-bust operation sa kapolisan batok sa ilegal nga pagbaligya ug pag-refill sa LPG ug butane canisters diha sa Sitio Kagwangan, Barangay Tarong, Lungsod sa Madridejos kagahapon.

Ang operasyon gipahigayon sa hiniusang pwersa sa 1st Provincial Mobile Force Company (1st PMFC), Madridejos Municipal Police Station ug Regional Intelligence Division (RID) sa Police Regional Office-7.

Base sa taho sa kapolisan, nasakpan ang duha ka suspetsado nga namaligya og ilegal nga nag-refill sa butane canisters.

Atol sa operasyon, nadiskubrehan usab sa mga operatiba ang 30 ka master cases sa gituohang smuggled nga mga sigarilyo nga naglangkub sa 14 ka master cases sa United Menthol cigarettes ug 16 ka master cases sa Bosston cigarettes nga adunay gibana-banang kantidad nga P3 milyones.

Na-recover usab sa mga polis ang 325 ka ilegal nga gi-refill nga butane canisters, usa ka LPG refilling setup nga naglangkub sa 50-kilogram LPG tank, weighing scale, improvised refilling equipment ug ang gimarkahang buy-bust money.

Giawhag sa Cebu Police Provincial Office ang publiko nga magpadayon sa pag-report sa mga ilegal nga trading activities, smuggling ug uban pa’ng ilegal nga operasyon aron mapadayon ang kalinaw ug kahapsay sa lalawigan.  BDB BANAT NEWS