Cebu Greats milatigo sa QC Black Bulls

CEBU, Philippines — Ang nanginit nga Cebu Greats/MJAS Zenith mitumba sa Quezon City Black Bulls, 74-61, alang sa ikalima nilang sagunson nga daog sa SportsPlus Maharlika Pilipinas Basketball League (MPBL) Season 8 niadtong Lunes sa gabii, Hunyo 29, didto sa Paco Arena Events and Sports Center sa kaulohan.

Si Mark Meneses mikulit og double-double nga 15 puntos ug 10 ka rebounds uban ang usa ka assist, duha ka steals ug tulo ka blocks sa dihang ang Greats midaog sa ika-10 nga higayon sa miagi nilang 11 ka duwa aron padayong kuyogan ang Biñan Tatak Gel sa ikatulong puwesto sa South Division standings bibit ang parehong 12-3 rekords.

Sila si Kint Ariar ug Alvin Baetiong midugang og 10 puntos matag usa alang sa Cebu, nga maoy midiktar sa dagan sa duwa sukad miposte og 19-17 nga labaw human sa nag-unang 10 minutos sa aksiyon.

Ang Greats miinat sa ilang bentaha ngadto sa 36-26 sa halftime, nga ilang namintinar, 59-49, human sa tulo ka kuwarter.

Ang Black Bulls nakapaduol ngadto sa sayes puntos, 54-60, apan didto ra sila kutob gumikan kay ang Greats mitak-op sa duwa pinaagi sa 14-7 rally aron silyohan ang 13 puntos nilang kadaogan.

Ang Greats mopahuway og usa ka semana sa dili pa mopadayon sa ilang kampanya batok sa Negros Hacienderos karong Hulyo 6 didto sa Ynares Sports Arena sa dakbayan sa Pasig.

Sila si Christian Jake Agoncillo ug Kobe Monje nagkumboya'g 25 puntos ug 11 ka rebounds sa way kapuslanan kay ang Black Bulls natagak sa 7-8.