Reclamation ordinance sa probinsiya giamendar

CEBU, Philippines — Mas sayon na karon alang sa mga kompaniya nga adunay reclamation projects sa Sugbo ang pagtuman sa ilang obligasyon ngadto sa Probinsya human gibalik sa Cebu Provincial Government ang tulo ka kapilian sa pagsunod sa reclamation ordinance.

Ubos sa Provincial Ordinance No. 2025-18, mahimo nang mopili ang reclamation proponents kung unsaon nila pagtuman sa 10 porsiyentong bahin nga angay madawat sa Probinsya.

Mahimo silang mohatag og 10 porsiyento sa magamit nga reclaimed land, mobayad sa katumbas nga kantidad base sa kasamtangang appraisal o market value, o mopuli og laing yuta nga parehas og bili. Matod ni Provincial Administrator Atty. Ace Durano, sa wala pa mausab ang ordinansa, obligado ang mga developers nga ihatag ang pisikal nga 10 porsiyento nga bahin sa ilang reclaimed area ngadto sa Probinsya. "Sa una, ang 10 porsiyento kinahanglan gyud nga pisikal nga bahin sa reclamation. Apan sa ubang proyekto, dili kini praktikal kay maguba ang ilang development plan," matod ni Durano. Gibutyag usab ni Durano nga adunay mga kompaniya nga nahuman na ang ilang reclamation apan wala pa motuman sa 10 porsiyentong bahin tungod kay naghulat sila nga maamendar ang ordinansa.

Miingon siya nga daghang investors ang naglisod sa daang sistema ug adunay mga plano sa reclamation nga wala napadayon tungod sa higpit nga kinahanglanon nga mohatag og pisikal nga bahin sa yuta.

Sumala ni Durano, kadaghanan sa mga proponents nga adunay existing reclamation projects mas gusto nga mobayad na lamang sa katumbas nga kantidad imbes nga mohatag og bahin sa reclaimed land.

Alang sa Provincial Government, dako usab kini og benepisyo tungod kay makahatag kini og dugang kita sa probinsya.

Sa inaugural meeting sa Cebu Provincial Reclamation Authority (CPRA), giaprobahan usab ang resolusyon nga nagmando sa Provincial Investment and Promotions Office nga mosulat sa mga reclamation proponents aron pormal nilang ipahibalo kung unsang compliance option ang ilang pilion. Samtang, matod ni Provincial Assessor Michelle Languido, kung cash payment ang pilion sa developer, ang kantidad nga bayran ibase sa kasamtangang appraisal o market value sa yuta sa panahon sa pagbayad ug dili sa bili niini sa dihang nahuman ang reclamation project. Gipasabot usab ni Durano nga ang tax declaration importante isip pamatuod sa pagpanag-iya sa reclaimed property ug usa kini sa unang lakang aron mahatagan kini og titulo. (BANAT NEWS)