14-anyos nga tinun-an gipareglahan, angol

CEBU, Philippines — Samtang nagkakusog ang mga panawagan ug gipahugtan ang seguridad para sa  kaluwasan sa mga bata diha sa sulod sa ilang mga eskuylahan ning nanglabay nga mga adlaw tungod sa nahitabo sa Tacloban City, sa gawas sa mga eskuylahan naa gihapoy mga hulga sa mga bata nga wala kaayo hatagi og pagtagad sa mga otoridad ug bisan sa mga kabarangayan.

Sa Cebu City, naay usa ka 14-anyos nga estudyante ang gitabangag kulata sa laing grupo sa mga kabatan-onan, gitionan og pusil ug gibunalan sa ulo gamit ang puloan sa armas sa gawas sa usa ka eskuylahan.

Sa CCTV footage diha sa Imus Road, Barangay Day-as nakuha ang insidente diin makita ang duha ka grupo sa mga kabatan-onan nga nagginukdanay.

Nakaikyas ang duha ka bata sa unang grupo nga gigukod apan ang nahibilin ang usa nila ka kauban ug maoy gitabangan og kulata sa mga nigukod nga mas daghang mga kabataan. Nahitabo ni dili layo sa public school sa Zapatera Elementary School.

Sa report sa One Balita Bai kagahapon, si Barangay Day-as Kapitan nga si Freddie Esmas niklaro nga dili mga ilang barangay ang mga batang nalambigit.

“Kanang mga batan-on naa na silay grupo grupo, estudyante sa Zapatera, ang involved ani, mga estudyante gikan sa Lorega San Miguel, ug Arellano, naginukdanay, nagkinulatahay, alarming kaayo, labi karun sa nahitabo sa Tacloban,” matud ni Esmas.

Matud pa nga ang usa sa nikulata sa biktima, backup sa mga estudyanteng nanggukod sa mga bikima. Gibanabana kini nga 14 ngadto sa 16 anyos ug giingong nalambigit na og pipila ka krimen.

Ang maong lalaki nga giingong nagsuot og itom nga t-shirt gikatahong dunay dalang pusil, gitionan ang biktima ug gipusil unta apan nikagar ang armas maong gibukbok ang bata sa puloan sa armas diha sa ulo hinungdan sa pagkasamad niini.

Human sa insidente, nanagan ang mga suspetsado samtang ang biktima mipadayon sa paglakaw.

Ang inahan sa biktima nga nahinabi sa One Balita Bai miingon nga nagsugod ang insidente human giagda ang iyang anak ug iyang mga  kauban og basketball challenge sa grupo sa mga suspek, apan nibalibad sila tungod kay busog pa ug walay kwarta.

“Giagda silag basket kining kauban sa akong anak, pero nibalibad sila kay busog pa sila og wala pud silay kwarta. Gilabayan dayon sila og bato sa mga suspek, nagpalaban ning kauban sa akong mga anak sa siga dire sa among barangay, mao to ila sab giresbakan, pag resbak didto na nagdako ang away, nagpalaban pud ‘tong pikas sa katong nagdalag pistola,” matud pa sa mama sa biktima.

Gikataho nga 15 ka indibidwal ang nalambigit sa insidente ug tulo na ang nadakpan. Apan kadtong nagdala og armas padayon pang gipangita.

Ang mga suspetsado pulos mga menor de edad nga nag-edad 14 hangtod 16 anyos ug pulos mga estudyante sa laing eskuylahan.  IBM BANAT NEWS