Governor's Zero Hunger Run kasado na karong Agosto 2
CEBU, Philippines — Nadasig sa mainiton nilang tinguha alang sa mas himsog nga Sugbo samtang suportaan ang away batok sa kagutom, ang kagamhanan sa probinsiya sa Sugbo nga gipangulohan ni Gobernador Pamela "Pam" Baricuatro magpahigayon sa labing unang Governor's Zero Hunger Run karong Agosto 2, nga magsugod ug matapos sa Capitol grounds.
"This is just one of the many programs that we came up for the development of sports in Cebu," matud pa ni Cebu Provincial Sports Commission Chairman Dr. Rhoel Dejano atol sa pormal nga paglusad sa mahinungdanong kalihukan kagahapong adlawa sa Capitol conference room.
Uban ni Dejano mao sila si provincial sports commisioner ug project-in-charge Francis Chad Salimbangon, sports consultant Dr. Janos Vizcayno Jr., Executive Director for Sports Engr. Rodrigo Tanza Jr., Atty. Kevin Dinsay sa Governor's Office, Wilbert James Gacrama saTechnical Working Group, ug race director Dwight Velasco.
Si Salimbangon nagkanayon nga target nila nga makahakot og 2,500 ka mga partisipante ning labing unang running event sa Kapitolyo nga kabahin sa selebrasyon sa ika-457 nga Founding Anniversary sa Sugbo.
Dul-an sa P250,000 nga ganting salapi ang ipang-apud sa mga mananaog.
Ang male ug female nga kampiyon sa 21K category mobulsa og P20,000 matag usa samtang ang mopahiluna sa ikaduha ug ikatulong dapit makadawat og P15,000 ug P10,000. Ang 4th ug 5th parehong mobitbit og P5,000.
Sa 12K, Top 3 mokubra og P10,000, P8,000, ug P5,000, samtang ang 4th ug 5th adunay tag-P3,000 nga premyo.
Ang Top 5 sa 6K mokabi og P8,000, P6,000, P4,000, P3,000, ug P2,000 samtang ang Top 3 sa 3K moangkon og P5,000, P3,000, ug P2,000.
Ang rehistrasyon nagkantidad og P600 sa 1K Fun Run, P800 sa 3K ug 6K, P1,250 sa 12K, ug P1,600 sa 21K.
Kadtong interesado moapil gihatagan kutob lamang karong Hulyo 2 aron magpalista alang sa karera.
Lon on sa https://megatechph.com/events/1st-governor's-zero-hunger-run aron magparehistro.
- Latest
