Giannis motapon sa Heat

CEBU, Philippines — Ang two-time MVP nga si Giannis Antetokounmpo moabli og bag-ong panid sa iyang karera sa NBA.

Kini human gitaho sa ESPN kagahapong adlawa nga si Giannis mobalhin sa Miami Heat gikan sa Milwaukee Bucks pinaagi sa usa ka blockbuster trade.

Sigun sa ESPN, ang Heat mobira nilang Antetokounmpo ug Bobby Portis gikan sa Bucks hulip nilang  Tyler Herro, Kel'el Ware, Jaime Jaquez Jr. ug Kasparas Jakucionis.

Ang Bucks makadawat sab og tulo ka first-round picks, usa ka pick swap ug usa ka second round pick gikan sa Heat.

Ang maong kasabotan nagtuldok sa mga spekulasyon kabahin sa ugma ni Giannis sa Milwaukee, nga iyang gihatagan og kampiyonato niadtong 2021.

Daan nang mipadayag ang 31-anyos nga Greek star sa iyang kasagmuyo sa Bucks ug gusto na niining moduwa sa laing koponan nga nahatagan na karon og katumanan.